Tá Coláiste Mhuire fréamhaithe i bpobal Iarthar Bhéal Feirste, pobal a bhfuil stair shaibhir chultúrtha aige agus tá áit lárnach ag an Ghaeilge sa Choláiste le fada an lá. Mar chuid dhílis den Cheathrú Gaeltachta, cuireann sé go mór le saol cultúrtha agus teanga an cheantair.

Tá ról ríthábhachtach ag an Choláiste i dtaca le múinteoirí a sholáthar d’earnáil an Ghaeloideachais sa chathair, i gCúige Uladh trí chéile, agus fud fad na tíre. Tá dhá chonair ann trína dtig le mic léinn oideachais cáilíocht mhúinteoireachta a bhaint amach, mar atá, BOid (Onór.) Bunscolaíocht le Gaeilge nó cúrsa iarchéime TICO. Ar an dá chúrsa seo, cuirtear oiliúint ar mhic léinn trí mheán na Gaeilge.